Heggestad og spelarane Skjeldestad og Bolseth er ihuga fans av Liverpool, som i kveld møter AC Milan i den greske hovudstaden.

Dei tre hadde saman med broren til keeper Skjeldestad sikra seg fly og kampbillettar til finalen gjennom eit selskap. Men tidleg i går vart gleda snudd til botnlaus fortviling.

Då kom nemleg kontrameldinga om at mange norske Liverpool-fans måtte avlysa turen, på grunn av manglande landingsgodkjenning for reiseoperatøren i Hellas.

– På treninga i dag kom Geir-Inge springande og fortalde om at flyet var kansellert. Eg var sikker på at han tulla, fortalte Skjeldestad i går ettermiddag.

Men tull var det dessverre ikkje.

– Vi har holdt på i heile natt med å skaffa landingsgodkjenning i Aten, men det var ikkje ein sjanse. No torde vi ikkje venta lenger, sa Tom Karoliussen i Premier Travel til ABC Nyheter.

Selskapet hadde seld 120 flysete til turen – mellom anna til gjengen frå Sogndal. Selskapet forsøkte også to andre flyplassar, Tessaloniki og Araxos, utan å lukkast.

– Vi hadde gleda oss skikkeleg til dette. Først ryk vi ut av cupen mot Stryn, og no dette. Men livet må gå vidare, sa ein betutta Skjeldestad.

Reiste likevel

Kvartetten frå Sogndal sette seg likevel på flyet til Gardermoen. Og arrangementssjefen vart redninga. Han fiksa rutefly i staden.

– No er det ei letta stemning her. Arrangementssjefen har vore kreativ og greid å miksa det til, fortalde Skjeldestad på telefon frå Gardermoen ved 20-tida i går kveld.

Heggestad fortel:

– Via knallhard telefonering har vi no fått ei rute både ned og opp som er til å leva med, både tidsmessig og økonomisk. I mi verd fins det ikkje problem, men utfordringar. Det er alltid nokon prosents sjanse for at ting løyser seg, seier han.

Båt til Istanbul

Sogndal-gjengen kvilte ut på hotell på Gardermoen i natt, før dei klokka 06.30 sat seg på flyet til Rhodos. Deretter går turen med fly til Aten, der dei etter planen skal landa klokka 14.

– Han frå reiseoperatøren har lova å koma med billettane på flyplassen når vi landar. Billettane er det eg er minst uroa over, seier Heggestad.

At gjengen er villig til å ofra mykje for å sjå favorittklubben sin, viser reiseruta dei skal ha tilbake i morgon.

– Først tek vi båt fra Aten til Istanbul, og deretter fly frå Istanbul via Amsterdam til Oslo, fortel Heggestad.

Ingen av dei vil ut med kva gildet kostar.

– Det er klart det vert dyrt. Men vi er innafor den grensa vi sette då vi planla turen, seier arrangementssjefen i Sogndal.

Avtalte i 2005

Terje Skjeldestad fortel at han har sett Liverpool «live» mange gonger. Men han var ikkje tilstades under den utrulege finalen mellom Liverpool og Milan i Istanbul for to år sidan, då Liverpool vann på straffer.

– Under finalen for to år sidan sat vi faktisk heime hjå meg. Då vart vi einige om at neste gong Liverpool kom til finalen, skulle vi gjere alt for å vere der, seier keeperen.

Og no ser det altså ut til at draumen går i oppfylling.

• Det er ikkje berre norske fans som har fått trøbbel. På grunn av streik blant italienske flygeleiarar har også mange Milan-supportarar fått turen øydelagd.